Ako’y gaya nga ng dalagang mahinhin,
Pili ng binatang aking iibigin,
Idurugtong ngayon sa puso’t damdamin,
Kasiping habang buhay magpahanggang libing!
Hindi mauubos ang tinig ng dibdib,
Kasama sa hinga nitong iyong bibig,
Kusang iluluwa sa lupang daigdig,
Kahit na ang tibok ay luhang pumintig!
Halika’t kumapit tayo’y maglalayag,
Sa mundong wala pang doo’y tumatapak,
Kumapit mabuti at tayo’y lilipad,
Sa langit ang tungo na magkaliyag.
Iyong mga ngiti ay lagi kong dala,
Sa gabi at araw, ako’y sumisigla,
At kung malungkot sa mga problema,
Hahagurin ng tingin ang mukhang maganda!
Walang komento:
Mag-post ng isang Komento